انسانی حقانی جہانی جارنامگ

یونیوَرسَل ڈیکلئیریشن آف ہیومن رائیٹس کہ 10 دسمبر 1948ءَ اقوامء متحدہءِ جنرل اسمبلیءَ منظور کتہءُ یو اینءِ درہیں باسکیں ملکاں مَنّ اِتہ۔

 

سَرلَبز

انسانی کہولءِ درہیں مردمانءَ لہتیں پیدائشی حق ہست کہ پہ ہر کسءَ مُدام برابر اَنتءُ ہچ رنگءَ چہ کَسےءَ زِنَگ بوت نہ کننت، ہمے حق درہیں جہانءَ اِنصافءُ ایمنیءِ بُن ہِشتءُ مانزَمان اَنت۔ اے ہمے بُنیادی حقانی لگتمالیءُ نہ منّگءِ آسر اِنت کہ انسانءِ ارواہءَ وتی سر پہ سرکشّیءَ درآورتگءُ بے رحمیءُ رستریءَ جاگہ کُرتگ۔

ہمک مردمءِ، یک انچیں جہانےءِ لوٹوک اِنت کہ اودا ہرکسءَ را وتی گپءِ جَنَگءِ آزادی بہ بیت، ہرکس وتی دینءُ ایمانءِ گچینءَ آزاد بہ بیت، ءُ ہمک مردم چہ تُرسءُ ہاجتاں آزاد بہ بیت۔

اگاں ما نہ لوٹیں کہ مردم چہ ظُلمءُ زوراکیاں بیزار بہ بنتءُ سرا پہ یاگی بُوّگءَ در بیارَنت، تہ الّم اِنت کہ انسانی حق، ملکانی قانونانی تہا ہوار بہ بنت۔

چوں کہ قومانی نیامءَ نزیکیانی وَدّینَگ الّمی اِنت،

چوں کہ اقوامء متحدہءِ درہیں باسکیں راجاں، انسانی حق، انسانءِ جندءِ شرفءُ عزت، مردینءُ جنیانی برابریءِ باروا وتی گپءُ باوَر یک رَندے پدا مَنّ اِتگءُ وتی قول نوک کُرتہ، ءُ گیشءَ گیش آزادیءِ تہا چاگردی دیمرویءِ مُہکم تِر کنگءُ زندگیءِ شَرتِرءُ آسُودہ تِر کنگءِ ارادہ کرتہ،

چوں کہ درہیں باسکیں ملکءُ قوماں اے قول کرتہ کہ آ درہیں جہانءِ تہا گوں اقوامء متحدہءِ ہمراہیءُ ہمکاریءَ انسانی حقءُ بنیادی آزادیءَ گیشءَ گیش مَنّنتءُ اے کارانی دیما برگءِ واستا وت ہم عملی جُہد کننتءُ دگراں ہم ہمے سکینءَ دئَینت،

پہ اے عہدءُ قولءِ سرجم کنگا الّمی اِنت کہ ہرکس اے بنیادی حقءُ اے آزادیاں گیشءَ گیش سرپد بہ بیت

پمیشکا

جنرل اسمبلی اے جارءَ جنت کہ انسانی حقانی اے جہانی جارنامَگ پہ درہیں قوماں یک ہوارینءُ مشترکہ سَنگءُ شاہیمے، کہ اشیءِ کُمکءَ چاگردءِ ہمک مردمءُ ہمک ادارہ تالیمءُ تبلیگ بکنتءُ انسانی حقءُ انسانی آزادیءِ واستا احترامءَ گیشءَ گیش بکنت۔ ہمے ملکیءُ میان استمانی کارانی سرا درہیں باسکیں ملک وتی مردمانی تہا ہم اے چیزاں بِہ مَنّائین اَنتءُ ہما راجانی تہا ہم کہ باسکیں ملکانی چیر دست اَنت۔

 

بند1 :  سجّهیں انسان آزاد پیدا بوتگ اَنتءُ درہیں مردمانی انسانی حقءُ شرف، چہ پیدائشءَ برابر اَنت۔ سجہیناں عقلءُ ہوش ہَست، ءُ بائد اِنت گوں یکے دومیءَ براتی گِریءُ نزّیکی بکننت۔

بند 2 : دُنیاءِ ہمک مردم اے درہیں حقانی حقدار اِنت کہ اے جارنامَگءِ تہا نبشتہ کنگ بوتگ اَںت۔ تُری مردمےءِ رَنگءُ زات، خاندان، زُبان، مذہب، سیاسی تعلق ہرچی بہ بیت، مردینے بہ بیت یا جنینے، آئیءِ خاندانءُ میراس تُری ہرچی بہ بیت، چاگردی بستارئِے تُری ہرچی بہ بیت، آ چہ اے حقاں ہچ رنگءَ زِبَہر کنگ بوت نہ کنت۔

بند 3 :  ہر مردمءَ اے حق ہست اِنت کہ وتی زند، وتی جندءُ وتی آزادیءِ پَہازءَ بکنت۔

بند4 : ہچ مردمءَ را اے حق نیست اِنت کہ دومی مردمءَ وتی گُلامءُ بَندہ بکنت۔ گُلام دارگ، گُلامءِ باپارءِ سرا پابندی جَنَگ بیت۔

بند5 :  ہچ مردم لَٹءُ کُٹءُ ٹارچر کنگ، سُبکءُ کَم شَرَف کنگ نہ بیت۔

بند6 : ہر مردمءَ را اے حق ہست اِنت کہ قانون، آئیءِ جندءَ را شرفمندءُ عزت مندیں مردمے بہ لیکیت۔

بند7 :  قانونءِ چماں درہیں مردم برابر اَنتءُ درہیں مرمانءَ اے حق ہست اِنت کہ قانون آہانی حفاظتءَ بکنت۔ درہیں مردمانءَ اے حق ہست اِنت کہ کَس گوں آہاں ہچ رنگیں زیادتی یے مکنتءُ اے جارنامَگءِ تہا نبشتگیں ہچ حق چہ مردمءَ زِنَگ مہ بیت۔

بند8  : ہر مردمءِ حق اِنت کہ اگاں کَسے کہ اے جارنامگءِ تہا نبشتگیں حقاں بہ پُلیت، تہ آ مردم عدالتاں برئوتءُ حقزُورءِ ہلاپءَ کیس بکنتءُ وتی حقاں بگیپت۔

بند9 : ہچ مردمءَ را، غیر قانونی صورتءَ قیدءُ بند یا درانڈیہہ کنگ بوت نہ کنت۔

بند10 : اگاں کَسےءِ سرا جُرمءُ گُناہےءِ بُہتام جَنَگ بیت، تہ آ مردمءَ را اے حق ہست اِنت کہ غیرجانِبدارءُ آزادیں عدالتے آئیءِ کیسءَ بچاریتءُ پہ حقءُ انصاف آئیءِ کیسءِ سرا فیصلہ بکنت۔

بند11

 ۔ 1 : کسےءِ سرا کہ قانون پروشیءِ بُہتام جنگ بوت، آ مردم تاں ہما وہدا بے گُناہ لیکگ بیت تانکہ یک آزادیں عدالتے آئیءِ کیسءَ نہ چاریتءُ فیصلہ نہ کنت۔ اے گپءِ ہیالداری الّمی اِنت کہ بُہتام جَتیں مردمءَ را وتی بے گُناہیءِ ثابت کنگءِ درہیں قانونی حقءُ موقع دئیگ بہ بنت۔

۔ 2 : اگاں مردمےءَ اَنچیں کارے کتہ، کہ کارءِ کنگءِ وہدا، آ کار، ملکی یا میان اُستمانی قانونانی تہا جُرمءُ گُناہے نہ بوتہ، تہ آ مردمءَ را پہ آ کارءَ ہچ رنگیں سزاءُ آزارے دئیگ بوت نہ کنت۔

بند12 : ہچ مردمءِ زاتی زندگی، آئیءِ لوگی زندگی، کاگدءُ کَرّاچانی تہا کَس تہا کَپت نہ کنت۔ ہچ مردمءِ بَنّام کنگءِ جہد کنگ بوت نہ کنت۔ ہر مردمءِ حق اِنت کہ قانون، چشیں ساہتاں آئیءِ حفاظتءَ بکنت۔

بند13

۔ 1 : ہر مردم، وتی ہما ملکءِ سیمسرانی تہا، ہر جاگہ کہ بلوٹیت، نشتءُ جہہ منند بوت کنت۔

۔ 2 : ہر مردمءَ را اے حق ہست اِنت کہ چہ ملکےءَ در بئیت، تُری آ ملک آئیءِ وتی بہ بیت، ءُ اے حق ئِے ہم ہست اِنت کہ وتی ملکءَ پِر بہ تَرّیت۔

بند14

۔ 1 : ہر مردمءَ را اے حق ہست اِنت کہ سزاءُ زوراکیءِ تُرسءَ دگہ ملکےءَ باہوٹ بہ بیتءُ باہوٹی رَسَگءَ رَند، چہ اودءِ آسراتیاں بَہرامَند بہ بیت۔

۔ 2 : بلے اگاں یک مردمےءَ اَنچیں جُرمءُ میارے کُرتگ کہ آ جُرم سیاسی نہ اِنت تہ آ مردمءَ را اے پناہءِ حق بائد اِنت مہ رَسیت۔ ہمے پئیما اگاں مردمءَ انچیں جُرمے کتہ کہ اقومء متحدہءِ رَہبندانی رِدءَ جُرمے، آ مردم ہم پناہءِ اے حقءِ حقدار نہ اِنت۔

بند15

۔ 1 : ہر مردمءَ را ملکءِ وطنیءُ جہہ منند بُوّگءِ حق ہَست اِنت۔

۔ 2 : ملکءُ ہاکمءِ دلءِ تبءَ ہچ مردمءِ وطنیءُ جہہ منند بُوّگءِ حق پچ گِرَگ بوت نہ کنت، ناں کہ کَسےءَ را چہ وتی ملکءُ جہہ منندیءِ بدل کنگا دارَگ بوت کنت۔

 16 بند

۔1 : ہمک رُستگیں مَردینءُ جنینءَ را اے حق ہست اِنت کہ وتی دلءِ تبءَ سورءُ سانگ کنگ بکنت۔ اے حقءِ دیما رنگ، مذہب، قوم ہچ رنگءَ اڑاندءُ رکاوٹ بوت نہ کننت۔ سورءُ سانگ، لوگءُ جاگہ کنگءُ سُہنءُ مُہرءِ حق، مردینءُ جنینءِ واستا برابر اِنت۔

۔ 2 : سورءُ سانگ، دوئین مردمانی آزادیءُ رَضامندیءِ سرا بوت کنت۔

۔ 3 : کہولءُ خاندان، یک چاگردےءِ اولیءُ بنیادی بُن ہِشت اِنت۔ بائد اِنت کہ چاگردءُ ملک، خاندانءِ حفاظتءِ ڈُبّہءَ بزورنت۔

بند 17

۔ 1 : ہر مردمءَ را اے حق ہست اِنت کہ ایوکءُ تہنا یا گوں دگرےءَ شریداریءِ سرا مِلکءُ میراس بزوریت۔

۔ 2 : ہچ مردمءِ مِلکءُ میراس پہ زورے پچگِرَگ بوت نہ کنت۔

بند 18 : ہر مردمءَ را وتی دینءُ مذہبءِ گچین کنگ، وتی زہنءُ ضمیرءُ وتی دلءِ گپءِ جنگءِ حق ہست۔ ہرکسءَ را اے حق ہست اِنت کہ اگاں وت بلوٹیت تہ وتی مذہبءَ بدل بکنت، ایوکءُ تہنا، یا گوں اندگہ مردماں ہوار وتی عبادتءَ بکنتءُ وتی مذہبءِ سرا عمل بکنت۔

بند 19 : ہر مردمءَ را وتی ہیالءُ لیکہ، یا نُکتہ نظرءِ دارگءُ آئیءِ درشانءُ تبلیگءِ حق ہست اِنت۔ اے حقءِ تہا اے گپ ہم ہوار اِنت کہ مردمے بے تُرسءُ بیمءَ وتی لیکہءَ گچین کُرت بکنت۔ ءُ ہما رنگءَ کہ وت بلوٹیت، چہ ملکءُ سیمسراں ہم بالاتِر، علمءُ زانگءَ شوہاز بکنتءُ وتی زانتءِ تبلیگءَ بکنت۔

بند 20

۔ 1 : ہر مردمءَ را اے حق ہست اِنت کہ پہ ایمنی گوں اندگہ مردماں ہور بہ بیتءُ گَلءُ تنظیم جوڑ بکنت۔

۔ 2 : ہچ مردمءَ را پہ زورے گَلے یا انجمنےءِ بَہر جوڑ بُوّگءَ مجبور کنگ بوت نہ کنت۔

بند 21

۔ 1 : ہر مردمءَ را اے حق ہست اِنت کہ وتی ملکءِ حکومتءِ چستءُ ایراں بہر بزوریت۔ اے کارءَ وت تچکءَ کنت یا وتی گچین کرتگیں نمائندہانی سیونجءَ۔

۔ 2 : ہر مردمءَ را وتی ملکءِ تہا سرکاری کارءُ روزگار یا پبلک سروسءَ بہر زورگءِ حق ہست۔

۔ 3 : عوامءُ مہلوکءِ رَزاءُ منشاء، یک سرکارےءِ حکومت کنگءِ واستا اولی شرط اِنت۔ عوام وتی اے رضاءُ مرضیءَ وہد وہدءِ سرا پاکءُ پلگاریں گچینکاریءِ بُنیادءَ پدّر کنت کہ آئیءِ تہا درہیں مردمانی اوٹ برابر اَنت۔ اے کار پہ چیریں اوٹ یا دگہ ہمے رنگیں کاررَہبندےءِ سرا کنگ بیت۔

بند 22 : چاگردءِ باسکےءِ بستارءَ ہمک مردمءَ را چاگردی تحفظءِ حق ہست اِنت۔ ءُ اے چیزءِ ہم حق ئِے ہست کہ ملکیءُ میان استمانی جہدءُ کوشستانی بنیادءَ، چہ وتی ملکءِ نظامءِ تہا ہستیں معاشی، دودمانیءُ چاگردی گواجنانی تہا، ہر ہما بہرءَ گِپت بکنت کہ پہ آئیءِ جندءُ آئیءِ شرفءُ عزتءِ ردومءَ الّمی اَنت۔

بند23

۔ 1 : ہر مردمءَ را اے حق ہست اِنت کہ وتی کارءُ روزگارءَ پہ آزادی گِچین بکنت، کارءُ روزگارءِ شرط مناسب بہ بنت۔ ءُ چہ بے روزگاریءَ بہ رَکّیت۔

۔2 :  پہ یکیں کارءُ روزگارءَ درہیں مردمانی مُزّءُ پگار یَک بہ بیتءُ اے رِدءَ ریاءُ رو مہ بیت۔

۔ 3 : ہر مردمءَ را چہ وتی کارءُ روزگارءَ ہمینکسیں مُزّےءِ حق ہست اِنت کہ آئیءِ جندءُ آئیءِ خاندان پہ عزت زندگ بوت بکننت۔ اگاں الّم بوت تہ چہ چاگردی تحفظءِ اندگہ راہءُ دراں آئیءِ مُزّ گیشتر کنگ بہ بیت۔

۔ 4 : ہر مردمءِ حق اِنت کہ پہ وتی نپءُ سیتانی پہازءَ کَسَبی یا تجارتی انجمن جوڑ بکنت یا انجمنےءِ بہر بہ بیت۔

بند 24  : ہر مردمءَ را دَم کنگءُ آرام کنگءِ حق ہست۔ اے رِدءَ کارءِ ساہتءُ پگارءِ گیشینگءَ ابید، وہد وہدءِ سرا مردمءَ را چُٹّی بِرَسیتءُ اے چُٹّیانی پگار ہم۔

بند 25

۔ 1 : ہر مردمءَ را اے حق ہست اِنت کہ پہ وتی جندءُ وتی لوگءِ مردمانی گِہبودیءُ گِہتریءَ یک الکاپیں زندے شوہاز بکنت۔ اے گہبودیءِ تہا وراکءُ وردن، پُچّءُ پوشاک، لوگءُ جاگہ، بیماریانی علاجءَ ابید ہما سجہیں چاگردی تحفظ ہم ہوار اَنت کہ آئیءِ واستا الّمی اَنت۔ بیروزگاری، بیماری، پیری، جنوزامی، آجزی انچیں چیز اَنت کہ مردمءِ وتی دستءَ نہ اَنت۔ اگاں چشیں چیزےءِ سوبءَ مردمے بیروزگار بوت تہ مردمءَ را چاگردی تحفظءِ درہیں حق بہ بنت۔

۔ 2 : نُنُّکءُ چُک ماتی، ہاسیں دلگوشءُ ہیالداریءِ حقدار اَنت۔ درہیں چُک، تُری سورءُ سانگ کتگیں ماتءُ پتاں پیدا کرتگ اَنت یا بے سورءَ، سرجمیں چاگردی تحفظءِ حقدار اَنت۔

بند 26

۔ 1 : ہر مردمءَ را تالیمءُ وانگءُ زانگءِ حق ہست اِنت۔ تالیم، مُپت بیت، کم از کم بنداتی تالیم مُپتءَ برسیت۔ بَنداتی تالیم ہرکسی سرا لازم اِنت۔ ٹیکنیکلءُ کارزانتی تالیم درہیں مردمانی دَزرَسءَ بہ بیت۔ بُرزتریں تالیم، لائکیءُ میرٹءِ سرا سجہیں مردمانی دزرسءَ بہ بیت۔

۔ 2 : تالیمءِ کار مردمءِ جندءُ زاتءِ دیمرویءُ مہکمی بہ بیت، درہیں مردمانی بُنیادی آزادیءُ بُنیادی حقانی احترامءُ عزت بہ بیت۔ تالیم بائد اِنت کہ مردمانی سرپدیءُ اوپارءَ گیش بکنت، ءُ مردم گوں اندگہ نسلءُ مذہب، ءُ اندگہ قومانی مردماں گیشتر نزّیک بہ بیتءُ جہانءِ تہا پہ امنءُ ایمنیءَ اقوامء متحدہءِ جہداں دیما ببارت۔

۔ 3 : ماتءُ پتانءَ اے گپءِ گچین کنگءِ اولی حق ہست اِنت کہ آہانی چُک چونیں تالیم دئیگ بہ بنت۔

بند 27

۔ 1 : ہر مردمءَ را اے حق ہست اِنت کہ وتی چاگردءِ ثقافتی زندگیءَ پہ آزادی بہر بزوریت، چہ چاگردءِ اِزمءُ سائنسی دیمرویاں بَہرامَند بہ بیت۔

۔ 2 : کَسے کہ سائنس، لبزانک، ازم یا دگہ انچیں چیزےءِ ساچوک اِنت، تہ آئیءَ اے حق ہست اِنت کہ وتی مالیءُ اخلاقی فائدہانی تحفظءَ بلوٹیت۔

بند 28 : ہر مردمءَ را اے رنگیں چاگرد یا میان استمانی نظامےءِ بہر بوگءِ حق ہست اِنت کہ آئیءِ تہا، اے جارنامگءِ نبشتگیں درہیں حقءُ آزادی ہوار بہ بنت۔

بند 29

۔ 1 : ہر مردمءَ را پہ وتی چاگردءَ ذمہ داری ہَست، چیا کہ ہر مردمءِ جندءُ زات، ہما چاگردءِ تہا پہ آزادی رُستءُ ردوم گِپت کنت۔

۔ 2 : چہ وتی آزادیءُ حقاں فائدہ چست کنگءَ، ہر مردم ہما رَہبندانی پابندیءَ بکنت کہ قانونءَ پہ اِندگہ مردمانی آزادیءُ حقءُ احترامءِ مَنّگءُ منّارینگءِ واستا یا یک جہہوری نظامےءِ تہا اخلاق، چاگردءِ امنءُ ایمنیءِ برجاہ دارگءُ مردمانی گِہبودیءِ واستا جوڑ کتگ اَنت۔

۔ 3 : اے حقءُ آزادی، ہچ رنگءَ اقوامء متحدہءِ مکسدءُ اصولانی ہلاپءَ کارمرز کنگ نہ بنت۔

بند 30 : چرے جارنامَگءَ کَس چشیں مانہءُ مکسدے درآورت نہ کنت کہ یک ملک، ٹولی یا مردمے انچیں کارےءِ کنگا وتا آزاد سرپد بہ بیت کہ آ کارءِ مکسد اے جارنامگءِ تہا داتگیں آزادیءُ حقانی لگتمالی بہ بیت۔

Pdf Balochi

Pdf English

 

Facebooktwittergoogle_plusredditpinterestlinkedinmail
Categories: Baluchi

Write a Comment

Your e-mail address will not be published.
Required fields are marked*